A Asociación Boirense de Empresas (ABE) impulsa o emprendemento local na Feira de Emprego de Boiro 2025

(Podes ver aquí a galería de fotos)

Boiro, 16 de maio de 2025

A Asociación Boirense de Empresas (ABE) fixo unha destacada participación na Feira de Emprego de Boiro 2025, un evento que reuniu profesionais, emprendedores e estudantes no Viveiro de Empresas de Boiro. A xornada foi un exemplo da vitalidade do tecido empresarial local e da importancia da colaboración entre institucións e empresas para fomentar o emprego, a formación e o autoemprego na comarca.

Un dos momentos máis relevantes foi a mesa redonda organizada pola ABE, titulada "Creando o Mañá: Como Converterte no Propietario da Túa Empresa", que contou cunha gran asistencia de público que encheu o auditorio, converténdose nunha das actividades máis concorridas da feira.

O acto foi presentado e moderado por Tomás Estévez, xerente da ABE, quen destacou ao inicio que “emprender non é cuestión de sorte, senón de traballo, perseveranza e apoio mutuo”. Ao longo da mesa, foron protagonistas catro empresas asociadas á entidade, que compartiron as súas historias de emprendemento:

• Carla Madrid, fundadora de Carla Madrid Cakes and Macarons, relatou como a súa paixón pola repostería e a creatividade a levaron a dar o salto como emprendedora. "Enfrontarse ao reto de emprender foi unha experiencia de aprendizaxe continua", comentou, facendo fincapé nas dificultades para conciliar a vida familiar e profesional.
• Luis Miranda Sueiro, director de finanzas e administración de Logística Sueiro Trans S.L., expuxo como a súa empresa familiar afrontou o desafío de modernizarse sen perder os valores de sempre. "O máis complicado non é moverse nun gran mercado, senón xestionar unha pequena empresa con recursos limitados; a formación e a profesionalización son imprescindibles", afirmou, destacando as dificultades específicas das pequenas empresas.
• Gerardo Triñanes, propietario de Asteleiros Triñanes Domínguez S.L., compartiu a súa experiencia persoal na empresa familiar despois de tentar emprender de forma independente. "As trabas burocráticas seguen a ser un dos principais obstáculos para os pequenos empresarios", sinalou, reclamando unha administración máis áxil e próxima.
• Daniel García, propietario de Baldani Concept Store e presidente da ABE, contou a súa evolución desde os mercadiños ata consolidar a súa propia tenda, resaltando a puxanza do sector cultural e social en Boiro. "Emprender aquí é un reto, pero tamén unha gran oportunidade. A ABE ten que seguir sendo un motor que impulse proxectos e xere emprego", declarou.

O moderador, Tomás Estévez, puxo en valor estas experiencias como exemplo da capacidade de superación e do compromiso coa economía local: “Son persoas como elas as que fan medrar Boiro día a día, con esforzo, ilusión e constancia”.

Compromiso da ABE co emprego e o emprendemento

A presenza da ABE na Feira non se limitou á mesa redonda. A entidade colaborou activamente co evento entregando 200 bolsas de algodón orgánico como agasallo aos asistentes, reafirmando así o seu compromiso coa sustentabilidade e o comercio de proximidade.

Ademais, patrocinou o premio de 100 € en Bonos ABE, sorteado entre as persoas participantes nos distintos talleres da feira. A premiada foi Jessica Estévez Taboada, quen recibiu o galardón da man de Daniel García, presidente da ABE.

As empresas asociadas tamén tiveron visibilidade durante toda a xornada mediante a publicación das súas ofertas de emprego nas pantallas do evento, facilitando a conexión entre empresas e persoas en busca de novas oportunidades laborais.

Valoración e continuidade

A ABE valora moi positivamente esta edición da Feira de Emprego, que contou con máis de 200 persoas inscritas nos diferentes talleres e consolidouse como un punto de encontro clave para fomentar o autoemprego e dar visibilidade ao tecido empresarial local.

Desde a entidade destacan a boa organización do Concello de Boiro e o traballo dos orientadores laborais, así como o compromiso das empresas participantes. A Asociación reafirma o seu obxectivo de continuar impulsando accións deste tipo e anima ás persoas emprendedoras a achegarse á ABE, onde dispoñen dun servizo de asesoramento inicial para apoiar a creación de novos proxectos empresariais.

"O noso compromiso é seguir apoiando ao emprendemento local, acompañando a quen decida dar o paso de crear o seu propio negocio en Boiro", concluíu Daniel García.